Lettre obèrta al Paire Nadal : Coma un marronièr…

Bon, te destorbi mentre qu’ès en plen pom. Sabi, ton quasernet de comandas es over-booké, ausissi los còps de martèls de ta brigada de faures ocupats a ferrar tos rèns per l’incursion de la nuèch mistica ont un còp mai lo miracle se va repetir. Es reglat coma de papièr a musica, lo pichon jésus va re-èsser pas lo 25 de decembre a 0 ora. Nenet nos va far l’ave. Junior farà los 400 còps. A 33, amb la faiçon, farà un braç d’onor a la crotz e s’installarà doctor. Hyde per tu, aï per ieu, coma canta l’autre…

Fin finala ès un sacrat buzziness man. Ton entrepresa pichona coneis pas la crisi, melhor es venguda una extrà multi internacionala. La mondializacion aquò fa polidas lurettes que la practicas, me demande e mai se ès pas tu que l’a inventada, manigançada, sacrat grigou va ! E quand pensi a totas aquelas gents que la crenhon, la combaton, me disi que i a quicòm de poirit al reialme de truanderie, coma cante l’autre… 

Al fach, es verai aquela istòria que çò se serián las AméricKains que t’an sostengut e que fin finala te manipulan dempuèi ta Lapònia natala ? World, world, world, lo Paire Nadal es una bordilha mas es lo mai grand magician del mond. Bon, totes tos emplegats qu’aicí e aquí racòlan sus la via publica, encostumats dins lor color Còke, son-çò dels intermitents del caumatge ? Son declarats al fisc, coma canta l’autre…

Bon, aicí, en bas de ma carrièra, dins las botiguetas pichonas, es pas la finfa granda… Ta cresença fotriá lo camp. Garda-te dels alter-noëlistes, van plan acabar per te getar un sòrt totes aqueles mescresents. Quand pensi que totes t’an cantat quand èran pichons, quand davalavas del cèl, coma cante l’autre…

Anatz té, coma un banal del miègjorn, nos vau recomandar de jogar al loto. Qué ? Mes tanben poirai foligaudejar amb los miliardaris de l’imaginable. Anatz venètz Milord, coma canta l’autre…

Hey ! Entre nosautres, es pas encara tu, que vestit coma un Rei mague, va remetre aquò a la debuta de genièr…

Jacme Gaudàs